ملا متقي: امريکا دې د افغانستان هوايي حریم نه نقضوي

تاند:(چار شنبه،د سنبلې شپاړسمه)‏‏ ‏د طالبانو د د بهرنیو چارو وزیر مولوي امير خان متقي په امریکا غږ وکړ چې نور د افغانستان هوايي حریم نقض نه کړي او د دوحې تړون ته ژمن پاتې شي.

 نوموړي نن په یوه خبري کنفرانس کې یو ځل بیا د روسیې پر سفارت په شوي ځانمرګي برید خواشیني څرګنده کړه او ټولو سفارتونو ته یې د امنیت ډاډ ورکړ.

ملا متقي په کابل کې د القاعدې شبکې د مشر

ایمن الظواهري وژل کیدو ته په اشارې وویل، نه امریکا تر اوسه دوی ته کوم شواهد او اسناد وړاندي کړي او نه هم په دې اړه د طالبانو څېړنې پای ته رسېدلي.

د هغه په وينا، کله چې د دوی بررسي تکمیله شي له افغانانو او نړۍ سره به یې پایلې شریکې کړي.

طالب مقام ونه ويل،چې دغه څېړنې یې کله بشپړيږي او آيا د الظواهري جسد دوی موندلی کنه ؟

هغه په عین حال کې نه دي ويلي،چې د افغانستان په هوايي حريم کې د امریکا د بې پیلوټه الوتکو د ګرځیدو د دوام په صورت کې به د طالبانو غبرګون څه وي؟

په وروستيو کې د افغانستان له مختلفو سيمو څخه د امریکا د بې پیلوټه الوتکو د ګزمو خبرونه ورکول کېږي.

د طالبانو د دفاع وزیر ملا یعقوب مجاهد ویلي،چې دغه الوتکې د پاکستان له خاورې افغانستان ته الوتنې کوي او پاکستان باید له امریکا سره د دوی خلاف همکاري پای ته ورسوي.

د طالبانو د بهرنيو چارو وزير مولوي متقي په دې اړه پاکستان ته کومه اشاره ونه کړه.