تاند( چار شنبه، د سنبلې نهمه) د طالبانو د رسمي نظرياتو منعکس کوونکي باختر اژانس په یوه تبصره کې پاکستان د افغانستان او طالبانو پر وړاندې د امريکا متحده ايالاتو «جرمي شريک» ګڼلی.
دغه اژانس په یوه تبصره کې لیکلي،چې د پاکستان د بهرنيو چارو وزارت په افغانستان کې د امریکا ګرځيدونکو بې پیلوټه الوتکو ته د اډې ورکولو په اړه د طالبانو د دفاع وزیر د څرګندونو په اړه له واقعیتونو تېښته کوي او دا موضوع د دیپلوماتیکو تورونو شاته پټول غواړي.
باختر اژانس زياتوي:«د افغانستان د هوايي حريم د نقضولو عامل يوازې امريکا نه ده هغه هېواد چې خپل هوايي حريم يې د امریکا په واک کې ورکړى د جرم شريک دى او دغه تور د عالمانو د سترې غونډې په پريکړه ليک کې چې څه موده مخکې په قندهار کې جوړه شوه بيان شو.»
د طالبانو تر کنټرول لاندې باختر خبري اژانس باور لري،چې د پاکستان د بهرنيو چارو وزارت لاره ورکه کړې او که نه لازمه وه چې د طالبانو د دفاع وزیر له خوا طرحه شوې موضوع په دقت سره تعقيب کړې وای او د دې ستونزې د حل لپاره يې د حل لار لټولې واى.
د طالبانو او پاکستان د وروستیو مطبوعاتي ناندريو له دوام سره، د طالبانو د بهرنيو چارو وزير مولوي امیرخان متقي او د وزارت مطبوعاتي دفتر ېې تر اوسه په دې اړه څه نه دي ويلي.
له دې کبله نوموړی وزارت او چارواکي ېې له ځینو نیوکو او پوښتنو سره هم مخامخ دي.