تاند( چار شنبه ، د سنبلې دويمه) د طالبانو د ادارې د اطلاعاتو او فرهنګ وزارت تر خپل چتر لاندې د رسنیو د شکایتونو او سرغړونو کمیسیون جوړ او پرون یې لومړۍ غونډه ترسره کړې ده.
د باختر آژانس په حواله؛په دې غونډه کې پر دې ټینګار وشو چې د رسنیو ټولې قضیې دې د رسنیو د شکایتونو او سرغړونو د کمیسیون له لارې تعقیب شي او رسنۍ کولاۍ شي خپل شکایتونه او ستونزې له دغه کمیسیون سره شریکې کړي.
دغه راز په دې غونډه کې یادونه وشوه چې د دغه کمېسیون غړي چې د رسنیو د بنسټونو له استازو او له اړوندو دولتي مسوولينو څخه جوړ شوي، د تغير وړ دي.
د طالبانو د اطلاعاتو او فرهنګ وزارت سرپرست مولوي خير الله خيرخوا د دغه کميسيون له فعالیتونو د ملاتړ تر څنګ ويلي ،چې کمیسیون باید د اسلامي ارزښتونو او د هېواد ملي ګټو لپاره کار وکړي.
د رسنيو ځينو فعالينو د ياد شوي کميسيون په جوړیدو خوښي ښودلې او ويلي،چې په عمل کې د کميسيون د با صلاحيته فعاليتونو هیله لري.
دوی ټینګار کړی،چې نور نه باید د طالبانو استخبارات،امر بالمعروف او نورې ادارې په رسنیزو چارو کې مداخله وکړي.