تاند( چار شنبه ، د اسد ۱۹ مه) د طالبانو د واکمنۍ وياندويان وايي،چې د دوی امیرالمؤمنین په لوړ رتبه بستونو کې نوي ملایان پر دندو ګومارلي.
د طالبانو عمومي ویاند ذبیح الله مجاهد په یوه اعلامیه کې دغه ګومارنې په دې ډول اعلان کړي دي:
1ــ د اوبو او انرژۍ وزارت د انرژۍ مخکینی معین مولوي عارف الله عارف د ارشاد، حج او اوقاف وزارت د مالي او اداري معین په توګه.
2ــ د برېښنا شرکت مخکینی رئیس ملا محمد عیسی ثاني د اوبو او انرژۍ وزارت د انرژۍ د معین په توګه.
3ــ د هرات ولایت مخکینی ښاروال مولوي حیات الله د اطلاعات او کلتور وزارت د نشراتي معین په توګه.
4ــ د چارو ادارې لوی ریاست د ملي تدارکاتو مخکینی رئیس ملا حمدالله زاهد د ماليې وزارت د اداري معین په توګه.
5ــ د کندهار حوزې دبرېښنا مخکینی رئیس ملا محمد حنیف حمزه د برېښنا شرکت د رئیس په توګه.
6ــ د کندهار ولایت د کلیو دپراختیا او بیا رغونې ریاست مخکینی رئیس سید مولوي برآت شاه اغا ندیم د اترا ادارې د رئیس په توګه.
7ــ الحاج ملا عبدالهادي یعقوب د کندهار ولایت دفوائد عامې ریاست د رئیس په توګه.
8ــ د ښار جوړولو وزارت مخکینی مالي او اداري معین حافظ محمد امین د کندهار حوزې د برېښنا د رئیس په توګه.
9ـــ د کندهار ولایت د ترانسپورټ مخکینی رئیس ملا عبدالجبار اخند د دغه ولایت د کلیو د پراختیا او بیا رغوني ریاست د رئیس په توګه وټاکل شول.
د طالبانو د ادارې یادې ګومارنې په داسې حال کې دي،چې هېواد نه د بې کارۍ، نه خونديتوب او پر راتلونکي د نه باور له کبله د نورو افغانانو تر څنګ مسلکي کادرونه ورځ تر بلې د وتو په حال کې دي.
د طالبانو منتقدین دوی تورنوي،چې د واک له انحصار سره ېې نه يوازې دا چې د حکومتولۍ اساسات سره وپاشل، بلکې د لسیزو لپاره ېې افغانستان بې مسلکي کادرونو او ظرفيتونو هم کړ،چې تشه ډکول به یې ستونزمن او زيانونه به ېې اوږدمهاله وي.
طالبان د خپلو ملايانو د ګومارنې ننګه کوي او په ښکاره وايي،چې د شل کلنې جګړې ملګري یې ورته لومړیتوب لري.