تاند( چار شنبه ، د اسد ۱۲ مه) د خوست په نادر شاه کوټ ولسوالۍ کې د خوړو نړیوال سازمان په مالي ملاتړ او د افغان پراختیایي موسسي په همکارۍ د ۸۵۰ متره استنادي دېوال او د ۲۱ کیلومتره کانال د پاکولو چارې بشپړې شوې.
د خوست لپاره د طالبانو والي د پروژې په پرانېست غونډه کې وویل چې د ولایتي ادارې هڅه دا ده، چې د خلکو اساسي اړتیاوو ته په کتو له موسسو سره په ګډه پروژې تطبیق کړي.
په همدې حال کې د طالبانو له لوري د اقتصاد رئیس شهزاده پیر وویل، چې یادې پروژې د ۴۱ میلیونو افغانیو په لګښت د نادرشاه کوټ ولسوالۍ اړوند د ځینې خېلو په شمبوات سېمه کې پلي شوې دي.
هغه زیاته کړه، چې د یادو پروژو په پلي کېدو سره په یاده سېمه کې ۸۰۰ جریبه کرنیزه ځمکه، ۴۰۰ دکانونه او ۱۵۰ کورونه د سېلاونو له زیان څخه خوندي شول او هم د سېمې ۵۱۶ تنو ته په کې د کار کولو زمېنه برابره شوې وه.
د طالبانو له بيا واکمنيدو سره د بيارغونې ځينې ورته پروژې هم عملي کیږي،چې خلک ېې په نشت شمار ګڼي او د زیاتیدو غوښتنه ېې کوي.