تاند( سې شنبه ، د اسد ۱۱ مه) په کابل کې د طالبانو د حاکمې ادارې عمومي ویاند ذبیح الله مجاهد په کابل ښار کې د امریکا متحده ایالاتو د بې پیلوټه الوتکې پرونی برید تاييد او پر وړاندې یې توند غبرګون وښود.
مجاهد په یوه اعلامیه کې ویلي، چې دغه برید د کابل ښار د شېرپور سیمې پر یوه استوګنيز کور ترسره شو.
د طالبانو ویاند زیاتوي:«دا برید که په هره پلمه شوی وي دافغانستان اسلامي امارت یې په کلکو ټکو غندي او دبین المللي اصولو او ددوحې تړون ښکاره سرغړونه یې بولي.»
مجاهد ټینګار کوي، چې دا ډول کړنې د تېرو شلو کلونو د ناکامو تجربو تکرار او د امریکا د متحده ایالاتو، افغانستان او سیمې د ګټو خلاف عمل دی.
د طالبانو د ویاند په وینا، د داسې کړنو تکرار به شته فرصتونو ته زیان واړوي.
امريکا متحده ايالاتو په دې اړه کوم غبرګون نه دی ښودلی.
د ياد شوي برید د ترسره کیدو خبر د یکشنبې په ورځ سهار مهال تاند د خپلو سرچينو په حواله خپور کړ.
هغه خبر دلته لوستلی شئ:
سرچېنې: د امریکا بې پیلوټه الوتکو کابل کې د داعش پر ضد بریدونه کړي