تاند( يکشنبه ، د اسد ۹ مه) د پښتونخوا مشهور ملتپال سياستوال افراسياب خټک کابل ته د پاکستاني ملایانو د پلاوي د سفر په اړه توند غبرګون څرګند کړی.
ښاغلی خټک، چې د پاکستان په مشرانو جرګه کې سناتور او په دغه هېواد کې د بشري حقونو د سازمان مشر هم پاتې شوی، په يوه ټویټ کې لیکلي:«پاکستاني جنرالان/ملایان ځان ته د جینکو تعلیم او مارشلايي جمهوربت غواړي، خو په افغانستان یې ټوپکمار طالبان تحمیل کړي.»
افراسياب خټک زياتوي:« پاکستاني ملایان کابل ته د لاس پوڅو نظارت ته تللي، دوی نه چا پوښتنه ونه کړه چې تاسو په یوه اسلام کې دغه دوه رقمه چلن څنګه توجیه کوئ ؟ ټول چل د افغانستان استقلال ته جوړ دی.»
د افغانستان د بې واکه شوي ولسمشر لومړي مرستيال امرالله صالح د ښاغلي خټک دا څرګندونې ستايلي او له زړورتيا ېې ډکې ګڼلي دي.
کابل ته د پاکستان د مشهور ملا تقي عثماني په مشرۍ د پاکستاني ملایانو د يوې ډلې د سفر او لیدنو کتنو پر وړاندې د افغانانو توند غبرګونونه دوام لري.
دغه پلاوی، چې خو ورځې مخکې ظاهرآ طالب مشرانو ته د مشورو په موخه کابل ته راغلی و ، اوس ویل کېږي چې د طالبانو له ادعا شوي لوی مشر ملا هبت الله اخندزاده سره د ليدنې لپاره کندهار ولايت ته روان شوی.
د ياد سفر پر مهال طالب چارواکو سره د دغه پلاوي مغرورانه او د طالب چارواکو تحقير شوې څېرې د افغانانو له توندو غبرګونونو سره مخامخ شوي دي.
د پاکستاني ملایانو د دغه سفر پر مهال د طالبانو له رییس الوزرا ملا محمد حسن اخند او د لوړو زده کړو وزير مولوي عبدالباقي حقاني سره د دغو ملایانو د لیدنو ځینې عکسونو ډېر نور افغانان هم قهرولي دي.
د پاکستاني ملایانو د پلاوي یوه غړي د طالبانو له لوري د افغان نجونو له شپږم ټولګي څخه د پورته ښوونځيو د پرانيستلو خبر هم ورکړی.
ډېرو خلکو په دې اړه په خپلو غبرګونونو کې ویلي، چې د طالبانو پریکړې ټولې ډ پاکستان په لاس کې دي او طالبان د دغه هېواد ملېشې او د استخباراتي سیاستونو تامينونکي دي.
طالبانو بیا په دې اړه ټول تورونه رد کړي.
طالب په خپل وطن خه پوهیگی ، مکتبی شرمیدلیه روسی او آمریکایی نظامی او ملکی مشاورین می دی په یاد دی !