تاند( جمعه ، د اسد ۷ مه) د افغانستان د کرکټ په مرکزي لوبغالي کې نن مازیګر د شپږيزې کرکټ سياليو پر مهال چاودنه شوې ده.
د کرکټ بورډ د اجرايه رياست لپاره د طالبانو ټاکل شوي رييس نصیب ځدراڼ ويلي، چې د چاودنې له کبله د سیالیو څلور نندارچيان ټپيان شوي دي.
ځينو عيني شاهدانو د زياتې مرګ ژوبلې ادعا کړې ده.
د طالبانو نامنیتي بنسټونو او وياندويانو په دې اړه څه نه دی ویلي.
پر ټولنیزو رسنیو په خپرو شویو ویډیو ګانو کې ښکاري چې چاودنه د لوبغالي دننه د ننداره کوونکو په منځ کې شوې ده.
د دغې چاودنې پر مهال د شپږيزې کرکټ سياليو په چوکاټ کې د پامیر زلمي او بندامیر ترمنځ لوبه روانه وه.
د کرکټ بورډ چارواکو له پېښې وروسته د سیالیو د بيرته پيليدو خبر ورکړی.
د چاودنې مسوولیت چا پر غاړه نه دی اخیستی او نه پکې طالبانو څوک پړه ګڼلي دي.