تاند( پنجشنبه ، د اسد ۶ مه) کابل ته د پاکستاني ملایانو له سفر سره هم مهاله، د پاکستاني ملایانو د سفر نوي جزييات په ډاګه شوي.
دغه پلاوی، چې مشري ېې مفتي تقي عثماني کوي، له څو ورځو راهيسې په کابل کې دی.
د یاد شوي پلاوي د بوختياوو رسمي جزییات نه دي خپاره شوي، خو پرون د طالبانو چارواکو له خپل رییس الوزرا ملا محمد حسن اخند سره په ارګ کې د دغه پلاوي د ليدنې خبر ورکړ.
طالبانو د مفتي عثماني په حواله ویلي، چې هغه او ملګری پلاوی یې لا پخوا کابل ته راتلل، خو د ملا حسن اخند د بوختياوو له کبله ېې سفر ځنډولی و.
په ورته وخت کې ويل کيږي، چې دغه پلاوي د پاکستان د پوځ ځينې پيغامونه راوړي څو په کابل کې يې د پاکستان د تحريک طالبان وسله والې ډلې مشرانو سره شریک کړي.
د پلاوي مشر مفتي تقي عثماني ظاهرا په دې دليل، چې طالبانو په خپله اعلاميه کې د ملا حسن اخند د بوختياوو له کبله د پاکستاني ملایانو د سفر ځنډیدو يادونه کړې ویلي:«کابل ته د مشورو او ستونزو د حل لپاره بلل شوی یم.د رسنیو هغه خبره ناسمه ده چې زه ګنې د ټي ټي پي د مذاکراتو لپاره راغلی يم.»
په ورته وخت کې د پاکستان تحریک طالبان په یوه اعلامیه کې ویلي، چې مفتي عثماني سره ېې د سولې په اړه خپله اته مخيزه طرحه شریکه کړې ده.
ټي ټي پي وايي مشرانو ېې مفتي عثماني ته ويلي، چې جګړه ورباندې تپل شوې او له دې کبله چې د پاکستان مشران په غلطه لاره روان دي، پر ضد یې جهاد واجب دی.
پاکستاني طالبانو ټينګار کړی، چې د پاکستان مشران د شریعت په لاره نه ځي او خپل اساسي قانون ېې پر خلکو تپلی، ځکه خو جهاد یې باید پر ضد وشي.
د پاکستان رسمي ادارو او په کابل کې د طالبانو ادارې په دې اړه رسنیو ته څه نه دي ويلي.