تاند( دوشنبه ، د اسد ۳ ) د طالبانو د اوبو او برېښنا وزير عبدالطيف منصور په کابل کې د اوبو د کمښت د ناورین خبرداری ورکړی.
نوموړي له خلکو غوښتي، چې د اوبو په مصرف کې جدي احتیاط وکړي، کنه دا ناورين به ژر پر کابل ولايت حاکم شي.
ملا منصور په مشخص ډول د بریښنا په مرسته له ژورو کيندل شویو څاه ګانو څخه د خلکو پریمانه او بې ضرورته استفادې ته اشاره کړې، چې ويل کيږي د کابل ښار په هر څووم کور، دفتر او سوداګریز مرکز کې موجود دی.
د طالبانو دغه لوړپوړي مقام په ورته وخت کې د ۳ میلیونه ډالرو د هغې پروژې د پیل خبر ورکړی، چې پنجشېر نه کابل ته پرې د څښاک اوبه انتقاليږي.
د اوبو د چارو شنونکي پر پخوانیو چارواکو نیوکه کوي، چې د ځمکې لاندې اوبو د سرچينو د ښه مدیریت لپاره یې مسوولانه چلند نه دی کړی او افغانستان ېې يوه اوږدمهاله ناورين ته بیولی.