تاند( پنجشنبه ، د سرطان ۳۰ ) د حقاني شبکې ( لوېې پکتيا) د طالبانو مشر او د طالبانو د کورنیو چارو وزیر مولوي سراج الدين حقاني او د طالبانو د لوی کندهار د ډلې یوه مشر او د دوی د دفاع وزیر مولوي محمد یعقوب مجاهد، چې د دواړو ترمنځ د سختو رقابتونو خبره کیږي، په جلا- جلا ډول او هم مهاله توګه خوست او پکتيا ولايتونو ته سفرونه کړي دي.
د حقاني مطبوعاتي دفتر ویلي، چې نوموړي په خوست کې د ټولو سيمه ييزو ادارو د ګډې غونډې مشري کړې او پر اقتصادي موضوعاتو او خاص ډول پر غلام خان بندر ېې پاکستان سره د سوداګرۍ او راشه درشې پر زیاتوالي ټینګار کړی دی.
د طالبانو د دفاع د وزير ملا یعقوب دفتر بيا ويلي، چې نوموړي د پکتيا ځاځي اريوب ولسوالۍ ته سفر کړی او ډيورنډ فرضي کرښې نه د ليدنې ترڅنګ یې خپل ځواکونه په نقدي ډالۍ نازولي او وړانديزونه ېې اوريدلي.
دا په داسې حال کې ده، چې د طالبانو د لوېې پکتيا او لوی کندهار ډلې د واک او امکاناتو د وېش په سر په ناندريو بوخت او بهرني ملاتړي یې جلا- جلا ډلې ګڼل کېږي.
طالبانو بیا د دوی تر منځ د اختلافاتو خبرونه رد کړي دي.