تاند( چار شنبه ، د سرطان ۲۹ ) د پاکستان يو لوړپوړی پلاوی، چې کابل ته ېې سفر کړی، په افغانستان کې د بریښنا د تولید لپاره یې د دغه هېواد د لېوالتیا خبر ورکړی.
د پاکستان د سوداګرۍ او انرژۍ وزارتونو مرستيالانو د طالبانو د بهرنيو چارو وزير مولوي امیرخان متقي سره د لیدنې پر مهال ويلي، چې دوی د ډبرو سکرو په وسيله په افغانستان کې د بریښنا د تولید لېواله دي.
د طالبانو د بهرنيو چارو وزير پاکستاني پلاوي ته ويلي، چې په دې برخه کې د لازمو اسانتياوو برابرولو ته چمتو دي.
کابل ته د پاکستاني پلاوي د سفر په اړه وار د مخه يو شمېر افغان شنونکو خبرداری ورکړی و، چې پاکستان به پکې پر طالب چارواکو د پراخ نفوذ په وسيله له افغانستان څخه د پریمانه او ارزانه ګټو د طرحو عملي کیدو ته کار وکړي.
طالبانو بيا ویلي، چې دوی به د ملي ګټو په اساس چلند وکړي.
طالب وياندويانو د پاکستاني پلاوي په سفر کې د افغانستان د ګټو د خونديتوب ادعاوې هم کړي دي.