تاند( پنجشنبه ، د سرطان ۲۳ ) د افغانستان لپاره د پاکستان ځانګړی استازی محمد صادق خان وايي، چې هېواد ېې په ازبکستان کې د افغانستان په اړه په جوړيدونکي نړیوال کنفرانس کې برخه اخلي.
د هغه په وينا، په دې اړه یې نن په اسلام اباد کې د ازبکستان له سفیر عارف عثمانوف سره خبرې کړي دي.
صادق خان په خپله ټویټر پاڼه کې لیکلي:«د افغانستان په اړه د تاشکند د نړیوال کنفراس، امنیت او اقتصادي بدلونونو په هلکه په پاکستان کې د ازبکستان له سفیر ښاغلي عارف عثمانوف سره ګټوره ناسته ترسره شوه. پاکستان به په هغه کنفرانس کې چې د جولای له ۲۵ تر ۲۷ ترسره کېږي، ګډون وکړي.»
ټاکل شوې په دې ناسته کې تر ۲۰ د زیاتو هېوادونو پلاوي ګډون وکړي.
ازبکستان دا هم ویلي، چې په دې کنفرانس کې د طالبانو پلاوي هم د ګډون ډاډ ورکړی.
د دې کنفرانس مشخصه اجنډا تر اوسه نه ده په ډاګه شوې.
په وروستيو کې د افغانستان له خاورې څو ځلې د ازبکستان پر خاورې د بريدونو خبر ورکړل شوی، چې ځينې وخت ېې مسوولیت داعش ډلې پر غاړه اخیستی.