تاند( یکشنبه ، د سرطان دولسمه ) اروپايي ټولنې افغان ماشومانو ته ۴۰ ميليونه يورو مرسته اعلان کړې ، چې د ملګرو ملتونو د ماشومانو د ملاتړ صندوق ( يونيسف) له لوري به ولګول شي.
د يونيسف د معلوماتو له مخې ، یادې پیسې به د دغې ادارې او روغتيا نړيوال سازمان له لوري په ګډه د پولیو پرضد د واکسین په تطبيق او له ماشومانو څخه د ملاتړ په برخه کې لګول کېږي.
د سرچينې د معلوماتو له مخې ، د يادو پيسو ۲۵ میلیونه به د پولیو د واکسین او ۱۵ میلیونه نور د ماشومانو د ملاتړ پر پروګرامونو ولګول شي.
يونيسف په ورته وخت کې راز اندیښنه ښودلې ، چې د افغانستان د اقتصادي وضعیت له خرابيدو سره به د دغه هېواد ماشومانو له نور تاوتریخوالي او ګواښونو سره مخامخ شي.
یونیسف زیاتوي ، چې د پېچلي وضعیت او اقتصادي ننګونو له کبله به ډېر افغان ماشومان له افغانستان څخه د وتو خطرناکه لارې انتخاب کړي.
د ملګرو ملتونو د معلوماتو له مخې ، ډېری افغانانو د اقتصادي ستونزو له امله پر خپلو ماشومانو شاقه کارونه پيل کړي ، چې دا به يې د ماشومانو پر ژوند ناوړه اغېزې ولري.