تاند( شنبه ، د سرطان یوولسمه ) د طالبانو ځايي چارواکو ویلي، چې په ننګرهار کې ۹ تنه د قیمتي ډبرو د قاچاق په تور نیول شوي.
د دوی په وینا، په ګز درې سیمه کې نهه تنه د قیمتي ډبرو د قاچاق په تور نیول شوي چې له لومړنیو څېړنو وروسته به یې دوسیې عدلي او قضايي ارګانونو ته وسپارل شي.
طالبانو د يادو کسانو هويت نه دی په ډاګه کړی.
د طالبانو منتقدین ورته خبرونو ته په شکمن نظر ګوري او وايي ، چې طالبان د وړو غلاوو په تور نیول شوي کسان په علني ډول مجازات او محاکمه کوي ، خو د قاچاق او نورو جرمونو په تور د نیول شویو کسانو د محاکمې او مجازات څرک نه لګیږي.
ځینې خلک په ورته ناقانونه چارو کې پاکستاني اتباع او ورسره د دوی طالب همکاران په لاس لرلو تورنوي ، خو طالبانو دې تورونو ته ځواب نه دی ویلی.