تاند( پنجشنبه ، د سرطان نهمه ) د ملي جنبش ګوند مشر عبدالرشيد دوستم په کابل کې د طالبانو له لوري د ملایانو پیل شوې لوېې غونډې ته غبرګون ښودلی.
نوموړي ويلي: « په تېرو شلو کلونو کې د افغانستان د علماوو سراسري شورا په ځلونو – ځلونو له طالبانو وغوښتل ، چې له وژنو او وینه تويولو لاس واخلي ، خو طالبانو هیڅکله د علماوو سپارښتنې ونه منلې.»
دوستم زیاتوي ، چې اوس دې طالبان دا تمه نه کوي، چې په « فرمايشي غونډه » کې به ېې د اکوړه خټک د څو ملایانو خبرې ته افغانان ارزښت ورکړي.
د جنبش ګوند مشر دا هم وايي ، چې طالبان او د هغوی د وژنو او انتحار مفکوره په ځلونو – ځلونو د دیني عالمانو له لورې رد شوي دي.
دوستم باور لري ، چې طالب یوه قاچاقبره ډله او د سیمه ییزو استخباراتو نیابتي لښکر دی ، چې دیني عالمانو سره ېې هېڅ تړاو نشته.
طالبانو د دوستم او خپلو نورو منتقدینو نیوکو ته کوم غبرګون نه دی ښودلی ، خو له ملایانو سره د جوړې کړې لوېې غونډې دفاع ېې کړې او دا یې له دوی څخه د ټولو افغانانو ملاتړ ګڼلی دی.
د یادونې وړ ده ، چې ياده غونډه نن پيل شوه او درې ورځې به دوام وکړي.
د غونډې عکسونه او ویډیوګانې تر اوسه طالبانو نه دي خپاره کړي او معلومه نه ده ، چې کومو کابل مېشتو افغان سیاستوالو ګډون پکې کړی.
طالبانو د يادې غونډې د جریان غږیږه بڼه په ژوندۍ توګه له ځينو رسنيو خپره کړې ، خو ټلویزیوني نشراتو ته ېې اجازه نه ده ورکړې.