تاند( دوشنبه، د جوزا ۳۰ مه) د ننګرهار په غني خیلو ولسوالۍ کې نننۍ چاودنه، چې د يو شمېر کسانو د وژلو تر څنګ پکې لسګونه تنه ټپيان شول، د ملګرو ملتونو د سیاسي استازولۍ یوناما او پخواني ولسمشر حامد کرزي له لوري غندل شوې ده.
یوناما په يوه اعلاميه کې ويلي، چې پر ملکیانو داسې بریدونه باید ژر تر ژره ودرول شي.
د افغانستان پخواني ولسمشر حامد کرزي هم د دغې پېښې د غندلو په خوا کې دغه پېښه بشري جنایت ګڼلی دی.
د ننګرهار په غني خیلو ولسوالۍ کې نن د ولسوالۍ د روغتون د مشر په موټر چاودنه وشوه، چې ۲ تنه پکې ووژل شول او ۲۸ نور ټپیان شول.
پرون او وړمه ورځ بیا په کابل په دوو جلا جلا پېښو کې د یو سېکهـ په ګډون څلور کسان ووژل شول او اووه کسه نور ټپیان شول.
د نننۍ پېښې مسووليت چا پر غاړه نه دی اخیستی، خو د افغان سیکانو او هندوانو پر عبادت ځای د برید مسوولیت داعش ډلې پر غاړه اخیستی.
دا په داسې حال کې ده، چې د طالبانو د رييس الوزرا د اقتصادي مرستيال ملا عبدالغني برادر په ګډون د دوی يو شمېر مشرانو پرون له سوداګرو سره په يوه غونډه کې د هېواد په کچه د بشپړ امنيت ډاډ ورکړ.