تاند( دوشنبه، د جوزا ۳۰ مه) له يو شمېر شيعه مېشتو ولايتونو څخه راپورونه وايي، چې طالبانو په پوهنتونونو کې د جعفري فقې پر تدريس د بنديز امر کړی.
له دې سره، يو شمېر شيعه فعالانو د خپلو مذهبي زده کړو د منع کیدو خلاف اعتراضونه کړي.
په دې اړه له ولسي اعتراضونو څخه وروسته، د باميان ولايت لپاره د طالبانو والي مولوي عبدالله سرحدي په دې اړه خبري کنفرانس ورکړی.
نوموړي ویلي، چې د باميان پوهنتون چارواکي دې د جعفري فقې تدریس ته دوام ورکړي.
د هغه په وينا، په تحصلي نصاب کې د بدلون صلاحيت یوازې د طالبانو د لوړو زده کړو وزير لري او تر هغې، چې د جعفري فقې د نه تدریس په اړه د نوموړي لیکلی يا شفاهي حکم نه وي تر لاسه شوی، څوک د دغې فقې پر تدريس بندیز نه شي لګولای.
په باميان کې د تاند خبري سرچينو ويلي، چې د طالب والي دا څرګندونې له طالبانو څخه د شيعه ګانو د مخ په زياتيدونکې نا رضايتۍ په غبرګون کې دي.
تازه په دې ورځو کې طالبانو له دوی څخه د يوازيني هزاره طالب قومندان مولوي مهدي له ياغي کيدو او د سرپل په بلخاب کې د پوځي مرکزونو د جوړولو پر ضد په اقداماتو بوخت دي.
ويل کيږي، چې هغه په طالب حکومت کې د شيعه ګانو او هزاره ګانو د ونډې په نه ورکولو مرور دی.
طالبانو د نوموړي پر ضد د عملیاتو تیاری نیولی، چې د ډېرو هزاره فعالانو غوسه يې پارولې ده.