تاند( جمعه، د جوزا ۲۷ مه) افغاني سرې میاشتې د درملنې په موخه پاکستان ته د سوري زړه ماشومانو د لېږد لړۍ پیل کړه.
د طالبانو تر کنټرول لاندې باختر خبري اژانس ویلي، چې نن يې د دې لړۍ په پیل کې نهه ماشومان پاکستان ته د درملنې په موخه واستول.
سرچينه زياتوي، چې په پاکستان کې د الخدمت خیریه بنسټ له لوري د سوري زړه د ناروغانو د درملنې هوکړه لیک د روان کال د شعبان پر ۳مه د افغاني سرې میاشتې او الخدمت خیریه بنسټ تر منځ لاسلیک شوی و.
مخکې ورته ماشومان تر ډېره جرمني او یو شمېر نورو هېوادونو ته استول کیدل.
د طالبانو له واکمنيدو سره، د دوی واکمني نړۍ په رسمیت نه پېژني او افغانستان سره د ډېرو هېوادونو ورته تړونونه او همکارۍ ځنډیدلي، چې خلکو ته ېې ګڼې ستونزې پیدا کړي دي.