تاند( سې شنبه، د جوزا ۲۴ مه) د طالبانو د کډوالو او بېرته راستنیدونکو چارو وزارت نن له بېلابېلو موسسو سره د څه باندې ۱۰ میلیونه امریکایې ډالرو تفاهم لیکونه لاسلیک کړل.
د وزارت د خبرپاڼې له مخې، د دغو تفاهم لیکونو له لاسليک سره یادې موسسې زرګونه کډوالو او بېرته راستنیدونکو ته د روغتيايي خدمتونو، تخنيکي زده کړو، خوراکي توکيو او نقدي مرستو د برابرولو په برخه کې اسانتياوې برابروي.
په خبرپاڼه کې په دې اړه نور جزییات نه دي ورکړل شوي.
د يادونې وړ ده، چې د طالبانو له واکمنيدو سره په افغانستان کې د فقر کچه زياته شوې، چې په کور دننه بې ځايه شوي ېې ډېر زيانمن کړي دي.
په ځينو ولایتونو کې ادعا کیږي، چې د طالبانو د کډوالو او بېرته راستنیدونکو چارو وزارت له اړمنو خلکو سره کیدونکې مرستې پر طالب جنګياليو وېشي، خو د دغه وزارت چارواکو دا ادعاوې بې بنسټه ګڼلي دي.