تاند(شنبه، د جوزا ۲۱ مه) د اریانا افغان هوایي شرکت چارواکي وايي، چې دغه شرکت به ډېر ژر هند، کویټ او چین ته الوتنې پیل کړي.
دا خبر د طالبانو تر کنټرول لاندې باختر خبري اژانس په خپله ويب پاڼه خپور کړی، خو په اړه ېې نور جزییات نه دي ورکړي.
په وروستيو کې له هندوستان سره د طالبانو اړیکې مخ په ښه کیدو دي.
د جمهوري نظام له سقوط څخه وروسته د کابل هوايي ډګر د بې نظمیو، د هوايي ځواک د یوې لوېې برخې مسلکي کادرونو د جلا وطنۍ او دغه راز د طالبانو د حکومت د نه په رسمیت پېژندلو له کبله د اریانا او نورو افغان هوایي شرکتونو چارې او الوتنې له ګڼو ستونزو سره مخامخ شوې وې.
د افغان هوایي شرکتونو د چارو د خرابتيا له کبله د افغانستان ډېرې اړوندې الوتنې یا له ګاونډيو هېوادونو تر سره کیږي او یا هم له افغانستان څخه د همدغو او نورو هېوادونو د هوایي شرکتونو په وسیله ترسره کېږي.