تاند(چار شنبه، د جوزا ۱۸ مه) راپورونه وايي، چې طالبانو په هلمند کې سلمانیان په خپلو دوکانونو کې له عکس لګولو او غزني کې زده کوونکي له پیکي پريښودلو منع کړي.
ويل شوي، چې د غزني پر زده کوونکو د خولۍ ايښودل هم جبري شوي دي.
له دې سره، په هلمند کې د طالبانو د امر بالمعروف ادارې منسوبينو د هغو کسانو کمپیوټرونه وړي، چې د خلکو موبایلونو ته ېې سندرې او فلمونه اچول.
د طالبانو دغې ادارې او په ټوله کې ټول حکومت په وروستيو کې د خلکو ژوند ته محدوديتونه او مزاحمتونه اوج ته رسولي.
له دې سره، ډېری هغه خلک چې مخکې یې د طالبانو د بدلیدو خبرې او دوی ته لابۍ کولې، اوس له دوی څخه نهيلي ښکاري.
د طالبانو ډېرو داسې پلویانو هم له څه مودې راهيسې د دوی د داسې کړنو نقدول پیل کړي او خبرداری یې ورکړی، چې د همداسې فعاليتونو له دوام سره به د طالبانو واکمني ډېر دوام ونه کړي.