تاند(سې شنبه، د جوزا ۱۷ مه) د طالبانو د استخباراتو ادارې د اجمل حقیقي په نوم د يوه يوټيوبر او موډل په ګډون ۳ تنه مقدساتو ته د « سپکاوي» په تور نیولي.
دغې ادارې د حقیقي د خبرو ويډيو هم خپره کړې، چې نوموړی پکې جمهوري نظام د پردي فرهنګ او فحشا خپرولو په برخه کې په خپل ملاتړ تورنوي.
نوموړي دغه څرګندونې د کاغذ له مخې لوستي، چې ګومان کیږي خبرې په جبري ډول پرې شوي دي.
ويل شوي، چې حقیقي مخکې د قرآن کريم یو آیت د سندرې په بڼه ويلی و او توند غبرګونونه ېې پارولي وو.
هغه په دغه ویډیو کې ویلي، چې د ځان په اړه د طالبانو د محکمې هر ډول پريکړې منلو ته چمتو دی.
بل لور ته: د افغانستان د مخابراتو وزارت یوې باوري سرچينې تاند ته وويل چې طالبان د ده په وينا پر اجمل حقیقي له جبري او اعترافاتو سره غواړي په هېواد کې پر یوټیوب، ټیک ټاک او ځینو نورو ټولنيزو رسنيو بندیزونه ولګوي.
د طالبانو چارواکو د تاند د سرچينې د څرګندونو په اړه څه نه دي ويلي.