تاند(سې شنبه، د جوزا ۱۷ مه) د طالبانو د حکومت چارواکي وايي، چې تر راتلونکو څو ورځو به د آقینې- اندخوی له ریللار څخه کار اخیستل پیل شي.
باختر اژانس، چې د طالبانو تر کنټرول لاندې فعاليت کوي، ليکلي چې په فاریاب ولایت کې د اقینې- اندخوی اوسپنې پټلۍچې (۳۰) کیلومتره اوږدوالی لري، د پاتې چارو بهیر بېا پیل شو.
د دغې پټلۍچارې په ۶/۱۳/۱۳۹۸ هـ.ش. نېټه د ۳۰ میلیونه امریکایي ډالرو په ارزښت پیل شوې او ډیره اندازه ترسره شوې وې، خو د کرونا وبا د خپرېدو او په استملاک کې د ستونزو له امله یې د پوره کېدو چارې ځڼدېدلې وې.
سرچينه زياتوي، چې د دې پروژې په ګټه اخیستنې سره به ځایي خلکو ته کاري فرصتونه برابر او سوداګرو ته به نورې آسانتیاوې هم رامنځ ته شي.
همداراز د دې پروژې په پوره کېدو سره به انتقالات ډیر او په عوایدو کې ډیروالی راشي.
په نوې بڼه له سیمه ییزو هېوادونو سره د افغانستان اتصال او افغانستان د اسيا د وصل په مرکز بدلول د پخواني ولسمشر اشرف غني له مهمو موخو څخه وه او په دې برخه کې ېې ګڼې پروژې پیل کړې وې.
د طالبانو د بهرنيو چارو وزير مولوي امیرخان متقي هم څه موده مخکې د افغانستان په سیمه ییز اتصال ټینګار کړی و.