تاند(سې شنبه، د جوزا ۱۷ مه) د طالبانو د کرنې او مالدارۍ وزارت چارواکي وايي، چې د ځنګلونو د ښه ساتلو لپاره ځانګړي واحدونه جوړوي.
دغه اقدام په ظاهري توګه په ختیځ کې د نورستان په ځنګلونو کې د اور لګېدنې له امله اخيستل کېږي.
د طالبانو د کرنې وزارت معین مولوي صدراعظم ننګرهار ته د سفر پر مهال ویلي، چې دغه واحدونه به د دوی د د امنیتي ځواکونو تر څنګ له ځنګلونو ساتنه کوي.
ويل شوي، چې یوازې د ننګرهار د ځنګلونو ساتنې په موخه د بېلابېلو څانګو د کارکوونکو په ګډون یوه سل کسیزه قطعه جوړېږي.
ټاکل شوې، چې په دغو واحدونو کې به قومي او د سیمې مشرانو ته ونډه ورکړل شي.
د افغانستان ختيځ او جنوب ختيځ زیات ځنګلونه لري.
دا په داسې حال کې ده، چې ځینې راپورونو کې خپله د طالبانو ځايي قومندانان ګاونډيو هېوادونو، په خاصه توګه پاکستان ته د ځنګلونو د چارتراشو په قاچاق تورنیږي.