تاند(سې شنبه، د جوزا ۱۷ مه) د ملګرو ملتو سازمان له مرستندويو هېوادونو غوښتي چې د ژمي له رارسېدو مخکې له افغانستان سره د ٣ ميليارده ډالرو مرسته وکړي.
دغه سازمان خبردارى ورکړى، چې دوى له افغانستان سره د نغدي مرستو له تشې سره مخ دي او تشه بايد د ژمي له را رسېدو مخکې ډکه شي.
د ملګرو ملتو سازمان وړاندې له دې د روان عيسوي کال په بهير کې افغانستان ته د بېړنيو مرستو د رسولو لپاره د ٥ ميليارده ډالرو غوښتنه کړې وه.
په دغه سازمان پورې تړلو منابعو ويلي، چې يوازې ۱.۴ ميلياردو ډالرو ته لاسرسی پيدا کړى دى.
دغه سازمان له افغانستان سره د نورو ٣ ميلياردو ډالرو مرستې غوښتنه کړې او خبردارى يې ورکړى، چې دغه تشه بايد د ژمې له را رسېدو مخکې ډکه شي.
د ملګرو ملتو سازمان په خپل نوي رپوټ کې افغانستان د خوړو د ترلاسه کولو لپاره لومړی هېواد بللى دى.
د ښځو په برخه کې د بشر د حقوقو نړيوال کتونکي مرستيالې (هيدربار) په دې اړه يوې خصوصي راډيو ته ويلي چې د طالبانو د حکومت او نړيوالو ترمنځ د تعامل نشتوالى د افغانستان اقتصادي حالت خراب کړى دى .
د ملګروملتو د سازمان په نظر په افغانستان کې ٨،١٩ ميليونه تنه د سملاسي خوراکي توکيو مرستو ته اړتيا لري له دې جملې څخه په افغانستان کې ١،١ ميليونه ماشومان د مړينې له خطر سره مخ دي.
د طالبانو تر کنټرول لاندې د افغانستان باختر خبري اژانس د ملګرو ملتونو د دغې غوښتنې له رسنيز کولو سره ټينګار کړی، چې د بشري مرستو د ښې همغږۍ لپاره دې د طالبانو له حکومت سره تعامل وشي.
طالبانو مخکې په افغانستان کې د بشري ناورين په اړه د ملګرو ملتونو په ګډون د مختلفو نړيوالو بنسټونو څرګندونې ردولې او بې بنسټه ګڼلې.