تاند(یکشنبه، د جوزا ۸ مه) د طالبانو د بهرنيو چارو وزارت وياند عبدالقهار بلخي وايي، چې د افغانستان په ۱۰ ولایتونو کې اوس هم د نجونو ټول ښوونځي پرانيستي دي.
د هغه په وينا، په ډېرو دولتي ادارو کې هم ښځینه کارکوونکي بیرته خپلو دندو ته ستانه شوي او فعاليت کوي.
عبدالقهار بلخي په یوه مرکه کې ادعا کړې، چې ۱۲۰ زره ښځينه کارکوونکې اوس هم خپلو دندو ته حاضريږي.
د هغه په وينا، له دې ډلې څخه ۹۴ زره تنه یې د تدريسي وزارتونو او ۱۴ زره نورې د روغتيا، کورنيو چارو وزارت، پاسپورټ او کډوالو ادارو اړوندې دي.
د طالبانو دغه وياند د هغو ولايتونو یادونه نه ده کړې، چې ښځینه ښوونځي پکې ټول یو مخ پرانيستي دي.
ځينې سرچينې بيا څرګندوي، چې ډېری دغه ولايتونه غیر پښتني دي.
پر طالبانو د پښتنو فعالانو یوه لویه نیوکه دا ده، چې تېر ۲۰ کاله هم پښتانه تر هر چا دوی له زده کړو محروم کړل او اوس هم ټولو نه زيات تاوان پښتنو ته رسوي.