تاند(یکشنبه، د جوزا ۸ مه) د طالبانو د رییس الوزرا اقتصادي مرستیال ملا عبدالغني برادر د افغانستان د اهل تشيع له یو شمېر استازو سره په لیدنه کې دوی ته ویلي، چې د طالبانو د « اسلامي امارت» دروازې د ټولو افغانانو پر مخ پرانیستې دي.
نوموړي د ټولو هغو کسانو د هرکلي خبر ورکړی، چې په وینا یې افغانانو ته خدمت کوي.
د ملا برادر په وینا، د افغانستان د خلکو سوکالي او اقتصادي پرمختګ د طالبانو د واکمنۍ له لومړبتوبونو څخه دي او په دې برخه کې عملآ هڅې روانې دي.
طالب مقام دا څرګندونې په داسې مهال کړي، چې افغان سیاسي لوري د روان ناورين حل لپاره له طالبانو غواړي چې ټولو لوريو سره مذاکراتو ته کیني او د مذاکراتو په پایله کې یوې معقولې پايلې ته سره ورسيږي.
د طالبانو مشران بيا ټينګار کوي، چې سیاسي لوري او مخالفین دې د دوی لوی مشر سره بيعت وکړي.
د طالبانو د مخالفانو په باور، طالبانو ورته د طالب کیدو او جګړې دوه تحمیلي انتخابونه پريښي، چې له دې سره د وضعیت د خرابېدو ټوله ملامتي به د طالبانو په غاړه وي.