تاند(پنجشنبه، د جوزا ۵ مه) د افغانستان پخواني ولسمشر حامد کرزي په مزارشريف او کابل کې د پرون ماښام چاودنې وغندلې.
کرزي په یوه اعلامیه کې ویلي، چې دا چاودنې د بشر ضد جنایتونه او د ټولو انساني او اسلامي ارزښتونو خلاف وې.
هغه د پردو دسیسو د مخنيوي او سراسري سولې او تلپاتې ثبات د تامين لپاره د ملي خبرو په پیلیدو ټینګار کړی دی.
کرزي زیاته کړې، چې همداسې خبرې د افغانستان د ژغورنې یوازینۍ لاره کیدای شي.
طالبانو تېره شپه ناوخته تاييد کړه، چې د مزارشريف په درېيو او د کابل ښار د يوه جومات په بلې چاودنې کې نيږدې ۱۵ تنه وژل شوي او نيږدې ۳۰ تنه نور ټپيان دي.
د مزارشريف د چاودنو مسوولیت داعش ډلې پر غاړه اخيستی دی.
کرزي د ملي خبرو غوښتنه په داسې مهال کړې، چې طالبانو د يوې دوديزې لويې جرګې د جوړولو لپاره د کمیسیون ګومارلو خبر ورکړی.
د طالبانو ځينو مخالفانو بیا دې ته په اشارې سره ، چې دې ډلې ویلي چاسره د مذاکراتو اړتیا نه ویني، کيدونکې جرګه غولونکې او نمایشي ګڼلې ده.