تاند(چار شنبه، د جوزا ۴ مه) پر ښځو د قيوداتو له دوام او نړيوالو سره د تعامل په برخه کې د طالبانو له نه پرمختګ سره هم مهاله، د پخواني ولسمشر حامد کرزي د دفتر رييس عبدالکریم خرم پر افغانستان د نورو نړيوالو بندیزونو خبرداری ورکړی.
نوموړي نن په خپله ټويټر پاڼه کې انديښنه ښودلې، چې ممکن پر افغان ښځو د وروستيو قیوداتو له کبله پر افغانستان نوي بندیزونه ولګول شي.
د نوموړي په وينا، یو شمېر هېوادونه د طالبانو دغو قیوداتو ته خوشاله دي، ځکه د نوو بندیزونو او د افغانستان د لا نورې انزوا سبب ګرځي.
د خرم په وينا، د افغانستان خلک به د نوو وضع کیدونکو بندیزونو زغمونکي او قربانیان وي.
عبدالکریم خرم د دغو احتمالي بندیزونو په اړه نور جزییات نه دي ورکړي.
د جمهوري نظام له سقوط سره، په دې خاطر چې طالبانو په زوره افغانستان ونيوه او نظام یې سقوط کړ، امريکا متحده ايالاتو د افغانستان بانک شاوخوا ۱۰ ميليارده ډالره بانکي زېرمه، چې د امريکا په يوه بانګ کې ساتل کیده، کنګل کړه.
له دې سره، په مختلفو برخو کې نړیوالو ادارو او ګڼو هېوادونو په افغانستان کې خپلې کیدونکې مرستې ځنډولي، چې د سخت بشري او اقتصادي ناورين سبب شوی دی.
طالبان که څه هم دغه وضعیت سره د مقابلې او لازمو تدابيرو خبره کوي، خو د افغانستان لپاره د ملګرو ملتونو د سرمنشي ځانګړې استازې مېرمن ديبورا لاينز تېره اونۍ طالبان تورن کړل، چې د افغانستان د حکومتولۍ او اقتصادي چارو د سمبالښت په خاطر کوم پروګرام نه لري.