تاند(چار شنبه، د جوزا ۴ مه) د د افغانستان لپاره د اروپايي ټولنې سفیر آندرس وان برنټ د افغانستان وضعیت « خطرناک» بللی او ویلي، چې په دې اړه د پریکړو او له افغانانو سره د مطمینو مرستو په تړاو د اروپايي ټولنې او يو شمېر نورو هېوادونو سفيرانو د ويډيو کنفرانس له لارې خپلمنځي خبرې کړي دي.
وان برنټ د دغو خبرو د پایلو او پریکړو په اړه ډېر څه نه دي ويلي.
اروپايي ټولنې له طالبانو سره هم خپل تعامل ته دوام ورکړی، خو داسې ښکاري چې نور نهيلې شوې وي.
د بشري حقونو او په خاص ډول د ښځو د حقونو پراخ نقض او پرې بیساري قيودات، د پخوانيو جمهوري منسوبينو وژل او ځورول، د دوحې تړون نقض او په افغانستان کې د واک انحصار او نورو ترهګرو ډلو ته د فعالیت زمینه برابرول هغه لویې نيوکې دي، چې نړيواله ټولنه ېې پر طالبانو لري.
طالبان بيا د افغانستان وضعیت تر بل هر وخت د ډاډ وړ او ښه ګڼي او تور لګوي، چې پر ضد یې پراخ تبلیغات روان دي.
دا په داسې حال کې ده، چې له افغانستان څخه هره ورځ د زرګونو تنو د فرار خبرونه ورکول کېږي او د طالبانو يو شمېر مشران او له هغې ډلې عباس ستانکزی پرې ښکاره اعتراضونه لري.
څو ورځې مخکې سيګار ادارې په یوه راپور کې وويل، چې که ټولو افغانانو ته د پاسپورټونو او ویزو اسانتيا برابره شي، ښايي ټول له هېواده ووځي.