تاند(دوشنبه، د جوزا ۱۲ مه) د بریتانیا د استخباراتي چارواکو پر اساس، په اوکراین کې په درو میاشتو کې د روسي پوځیانو تلفات له هغه شمېر سره برابر دي چې پر افغانستان د نهه کلن یرغل په ترڅ کې شوروي اتحاد ته اوښتي و.
د واشنګټن ټایمز ورځپاڼې د راپور له مخې، د بریتانیا د دفاعي استخباراتو ادارې نن (دوشنبې) په یوه راپور کې وویل، د ټیټې سویې تاکتیکونه، د هوايي پوښښ محدودوالی، د انعطاف نشتوالی او د قوماندې څرنګوالی چې له کبله یې کومکي ځواک په وخت نه شي رسول کېدای او پرله بسې تیروتنې کېږي، په اوکراین کې د روسي ځواکونو د مرګ ژوبلو د لوړوالي اصلي دلایل دي.
له ۱۹۷۹ څخه تر ۱۹۸۹ بورې پر افغانستان د شوروي اتحاد د یرغل په ترڅ کې ۱۵ زره شوروي پوځیان ووژل شول او ۳۵ زره نور ژوبل شول. په همدې حال کې ناټو اټکل کوي چې پر اوکراین د روسي ځواکونو د یرغل له ورځې تراوسه پورې نژدې ۱۵ زره روسي پوځیان وژل شوي دي.
بریتانیايي استخبارات وايي چې د روسي پوځیانو مرګ ژوبلې له دې سره سره په ډېرېدو دي چې مسکو د اوکراین له ډیرو برخو خواکونه شا ته کړل او بېرته یې د دونباس سیمې ته ولېږل.
د بریتانیا استخبارات وايي چې د مرګ ژوبلو زیاتېدا په روسانو کې د جګړې په وړاندې نارضایتي زیاته کړې ده.