تاند(شنبه، د ثور ۳۱ مه) ‏‏د پاکستان د نوي حکومت د بهرنيو چارو وزیر بلاول بوټو له امریکايي چارواکو غوښتي، چې د افغانستان د مسایلو په اړه يې هېواد سره د نوي تعامل فکر وکړي.

نوموړي له اسوشيتد پريس خبري اژانس سره په تازه مرکه کې دا هم وويل، چې دواړه هېوادونه بايد د افغانستان د مسایلو په اړه ناندرۍ هېرې کړي.

نوموړي له خپل امریکايي سیال انتوني بلینکن سره خپله لومړنۍ لیدنه ستایلې او هیله بښونکې ګڼلې ده.

د پاکستان د نوي حکومت د بهرنيو چارو وزير پرته له دې، چې ملامت لوری په ډاګه کړي، ويلي چې د دواړو هېوادونو اړيکې د پاکستان د مخکيني صدراعظم عمران خان د حکومت پر مهال د افغانستان د مسايلو په سر ترينګلې شوې او واشنګټن پر اسلام اباد ملاحظې لرلې، خو دوی د دغو اړيکو بيرته رغول غواړي.

پاکستاني وزير دا هم ويلي، چې نړۍ دې د طالبانو د حکومت په اړه له خپلو نظرونو ور اخوا د افغانستان خلک له پامه نه غورځوي او بشري مرستې دې ورسره وکړي.

پاکستاني وزير له امریکا سره د افغانستان په اړه د خپلې نوې وړانديز شوې يا کيدونکې معاملې جزییات نه دي په ډاګه کړي.

پر پاکستان او امريکا دواړو د يو شمېر افغان منتقدینو تور دی، چې د افغانستان په جمهوري نظام یې د خپلو لویو ګټو لپاره مرموزه معامله کړې او دغه هېواد یې طالبانو ته سپارلی.

د افغانستان د بې واکه شوي ولسمشر لومړي مرستيال امر الله صالح څو ورځې مخکې په دې اړه ژمنه وکړه، چې ژر به پر جمهوري نظام د سیمه ییزو او نړیوالو معاملو جزییات په ډاګه کړي.

امريکا ته د بلاول بوټو له سفر سره هم مهاله، د پاکستان د نفوذي ډلې حقاني شبکې مشر او د طالبانو د کورنيو چارو وزير مولوي سراج الدين حقاني له سي این این ټلویزون سره مرکه وکړه او اعلان يې وکړ، چې دوی امریکا ته د دښمن په سترګه نه ګوري.