تاند(شنبه، د ثور ۳۱ مه) په ننګرهار کې د طالبانو چارواکو ويلي، چې نن دغه ولايت ته د پاکستان هېواد د خوراکي او غير خوراکي توکو اتيا ټنه مرسته ور رسیدلې ده.
د طالبانو په يوه اعلاميه کې راغلي، چې تورخم ښارګوټي کې الخدمت فاونډيشن له لوري پېښو ته د رسېدو په چارو کې د طالبانو وزارت ته د پاکستان هېواد د خوراکي او غير خوراکي توکو اتيا ټنه مرسته وسپارل شوه.
سرچينه زياتوي، چې ياده مرسته به په هېواد کې اړمنو کورنيو ته وويشل شي.
مخکې هم د پاکستان حکومت او یو شمېر بنسټونو له افغانستان سره د ورته مرستو خبر ورکړی و.
افغانستان سره د بشري مرستو په اړه پر طالبانو بيا- بيا تور پورې شوی، چې د مرستو په وېش کې اړيکې پالي او خپلو جنګیالیو يا خواخوږو ته لومړيتوب ورکوي.
طالبانو بیا په دې اړه ادعاوې بې بنسټه ګڼلي دي.