تاند(پنج شنبه، د ثور ۲۹ مه) د پاکستان د بهرنیو چارو وزیر بلاول بوټو زرداري، پر دغې دندې له ټاکل کیدو وروسته په يوه لومړني سفر امريکا متحده ايالاتو ته تللی دی.
نوموړي د دې سفر په لړ کې، د امریکا د بهرنیو چارو وزیر انتوني بلنکین سره وکتل.
بلاول بوټو چې د انتوني بلینکین په بلنه نیویارک ته تللی دی له نوموړي سره یې د سیمې د امنیت، دوه اړخیزېو اړیکو او د پاکستان اقتصاد د بیارغولو په اړه خبرې کړي دي.
پاکستان په وروستيو کلونو کې سخت اقتصادي ناورين سره مخ دی او پرون یې په بېساري ډول د يوه امريکايي ډالر پر وړاندې د کلدارو بیه تر ۲ سوه روپیو ورسیده.
د پاکستان او امريکا اړيکې ظاهرا په وروستيو کې ترينګلې شوې وې.
د پاکستان ګوښه شوي صدراعظم عمران خان ادعا کړې، چې امريکا ته یې په خپله خاوره کې پوځي اډې ورنه کړې، ځکه خو ګوښه کړل شو.
د پاکستان نوي حکومت له امریکا څخه د مرستو جذبولو لپاره دغه هېواد سره بيا اړيکې خوږې کړي دي.
په افغانستان کې حاکم طالبان، چې د پاکستان له پراخ ملاتړ څخه برخمن ګڼل کېږي، د کورنيو چارو وزير او د حقاني شبکې مشر یې څو ورځې مخکې وویل، چې امريکا ته د دښمن په سترګه نه ګوري.