تاند(چار شنبه، د ثور ۲۸ مه) د افغانستان د بشري حقونو په چارو کې د ملګرو ملتونو ځانګړی استازی ریچارډ بنټ د بشري حقونو د وضعیت ارزولو لپاره کابل ته راغلی.
ويل شوي، چې نوموړي د طالبانو د رييس الوزرا له سیاسي مرستیال مولوي عبدالکبیر او د بهرنيو چارو وزير مولوي امیر خان متقي سره ليدلي.
د طالبانو د بهرنيو چارو وزارت ویلي، چې د ملګرو ملتونو دغه استازی به د افغانستان پر اوسني وضعیت، مثبت بدلون، امنیت او پر بشري حقونو د حقایقو پر بسنټ راپور جوړ کړي.
د ملګرو ملتونو دغه استازي د طالبانو د رييس الوزرا سياسي مرستيال مولوي عبدالکبیر سره هم ليدلي.
مولوي کبير په دې لیدنه کې د ښځو پر وړاندې د طالبانو د نويو قيوداتو، چې د حجاب په نوم وضع شوي، دفاع کړې ده.
د طالبانو په یوه اعلامیه کې د دغه نړيوال استازي په حواله ویل شوي، چې د افغانستان د وضعیت په اړه پر رسنيزو راپورونو د استناد پر ځای له نيږدې غواړي وضعيت وارزوي او د بشري حقونو په اړه ملګرو ملتونو ته کره راپورنه وړاندې کړي.
ويل شوي، چې په دې ليدنه کې د ملګرو ملتونو استازي د ښځو د زده کړو، کار، حجاب، د رسنيو ازادۍ، د زندانيانو وضعیت، ټول شموله حکومت جوړيدو او د مدني ټولنې د وضعیت په اړه معلومات غوښتي دي.
د طالبانو د رييس الوزرا مرستيال ويلي، چې افغانستان د ملګرو ملتونو هغو کنوانسيونو ته ژمن دی، چې اسلام سره په تضاد کې نه وي.
نوموړي زیاته کړې، چې اوس د امنيت له تامينيدو سره بشري حقونه تر پخوا ښه تامينيږي او د هندوانو او سکانو په ګډون ټول افغان نارينه او ښځينه له دې نعمتونو څخه برخمنیدای شي.
مولوي کبير د حجاب په نوم د خپلو وضع کړو قوانينو په اړه ویلي، چې هره افغانه ښځه له حجاب سره ځان « ارامه» احساسوي.
د طالبانو د رييس الوزرا سیاسي مرستیال په دې لیدنه کې د طالبانو په لاس د غچ اخيستونکو وژنو او زندانيانو سره د ناوړه چلند راپورونه رد کړل.
هغه د ملګرو ملتونو ځانګړي راپور جوړونکي ته وويل، چې د طالبانو له زندانونو ليدنه کولای شي، څو ور معلومه شي چې هیڅوک د محکمې له حکم پرته بندي شوی نه دی.
د ملګرو ملتونو یاد شوی استازی په داسې مهال په دوه ورځیني سفر کابل ته راغلی، چې د طالبانو له لوري د بشري حقونو د نقض راپورونه زيات شوي.
طالبانو په دې اړه راپورونه رد کړي او بې بنسټه ګڼلي دي.