تاند(دوشنبه، د ثور ۲۶ مه) راپورونه وايي چې د طالب پوله ساتو او تاجکستاني پوله ساتو ترمنځ د کندوز ولایت په شېرخان بندر کې څو ساعته نښته شوې ده.
د څو سرچینو پر اساس، نښته د شنبې او یکشنبې ترمنځ په شپه کې پیل شوه او لږترلږه ۴ ساعته یې دوام وکړ.
د تاجکستان ایشیا پلیس اژانس د افغانستان انترنشنل تلویزیون په قول ویلي چې جګړه لومړی طالبانو پیل کړه. خو د افغانستان انترنشنل په اړه ویل کېږي چې بې پرې رسنۍ نه ده او عموماً یواړخیز راپورونه خپروي.
د ایشیا پلس پر اساس، په نښته کې دواړو خواوو له سپکو او درنو وسلو کار واخیست.
نښته وروسته له دې ودرول شوه چې د دوو خواوو سرحدي چارواکو په خپل منځ کې خبرې وکړې.
د روسیې سپوتنیک خبري اژانس د خپلو سرچینو په قول د طالب پوله ساتو او تاجک پوله ساتو ترمنځ نښته تایید کړې ده.
خو د افغانستان د طالبانو چارواکو او همداراز تاجکستاني چارواکو تراوسه پورې په دې اړه څه نه دي ویلي.
دا لومړی ځل دی چې د طالبانو او تاجکستاني ځواکونو ترمنځ په شېرخان بندر کې مخامخ نښته کېږي.
شېرخان بندر د افغانستان او تاجکستان ترمنځ د سوداګري راکړې ورکړې او تګ راتګ ترټولو مهم بندر دی.
د ۲۰۲۱ د اګست په ۱۵ مه د طالبانو له واک ته رسېدو وروسته تاجکستان د طالبانو د حکومت پر جوړښت په تېره بیا په دې خاطر چې په هغه کې د تاجکانو ونډه کمه ده، توندې نیوکې وکړې.
همداراز د پنجشېر جبهې اکثره مشرانو په پنجشېر کې له ماتې وروسته تاجکستان ته پناه یووړه.
د افغانستان د پخواني هوايي ځواک لږترلږه ۱۸ الوتکې او څرخکې هم تاجکستان ته وړل شوي چې د طالبانو حکومت ته یې نه سپاري.
امریکا او تاجکستان په وروستیو ورځو کې د دغو الوتکو په اړه خبرې وکړې خو د خبرو نتیجه یې څرګنده نه شوه.