تاند:( يکشنبه، د ثور پینځه ویشتمه) په غزني کې خلک شکایت لري، چې د طالبانو امنيتي ځواکونو په مختلفو سيمو کې د خلکو د شخصي موبایلونو پلټل پیل کړي او ۲۰ تنه يې له دغو پلټنو څخه وروسته نیولي هم دي.
د ځايي خلکو په وینا، د موبایلونو له پلټلو وروسته طالبانو په تېرو ۲ ورځو کې د غزني شاوخوا ۲۰ اوسیدونکي نیولي دي.
سرچينې وايي، چې دغه کسان په موبایلونو کې ېې د طالبانو د مخالفو څېرو، پخوانيو ملي ځواکونو او ملي بیرغ د عکسونو د موجوديت له کبله نیولي دي.
خلکو شکایت کړی، چې طالبانو یې شخصي پېغامونه هم پلټلي او د دوی خصوصي حريم یې نقض کړی دی.
معلومه نه ده، چې نيول شوي کسان چېرته وړل شوي او برخليک به یې څه وي؟
د طالبانو چارواکو په دې اړه څه نه دي ويلي.
ځايي خبريالان وايي، چې ورته کړنې په نورو ډېرو ولايتونو کې هم تر سره کیږي، خو د رسنیز کیدو فرصت یې نشته.