تاند:(پنجشنبه، د ثور دوه ويشتمه) د افغانستان پخواني ولسمشر حامد کرزي د افغانستان لپاره د ملګرو ملتونو له استازې مېرمن دیبورا لاینز سره د لیدنې پر مهال په هېواد کې د وروستیو نښتو په اړه انديښنه ښودلې ده.
د حامد کرزي مطبوعاتي دفتر ويلي: په دې کتنه کې له شپږم ټولگي پورته د نجونو د ښوونځیو پر ژر تر ژره پرانیستو او کار ته د ښځو پر بیا ورگرځېدو ټینگار وشو.
سرچينه زياتوي:«همداراز دواړو لورو په هېواد کې د وروستیو نښتو د راپورونو په اړه اندېښنه څرگنده کړه او تاکید وشو چې سرپرست حکومت دنده لري د هېواد ټول وگړي په یو ټغر راټول کړي، ملي اتحاد کلک او د خبرو اترو له لارې سوله او ثبات تامین کړي.»
د کرزي د دفتر په اعلاميه کې همدا شان راغلي:« پخواني جمهور رئيس د حجاب په اړه وویل”افغانان متدین خلک دي او تل یې د خپلو ملي عنعناتو سره سم د حجاب مراعات کړي .“»
په وروستيو کې د هېواد له یو شمېر ولایتونو څخه د طالبانو او د دوی د مخالفو وسله والو ډلو ترمنځ د نښتو خبرونه ورکړل شوي دي.
طالبانو په دې اړه د حامد کرزي انديښنو ته کوم غبرګون نه دی ښودلی، خو پر خپل ضد وسله والې هڅې يې د نه اندیښنې وړ او مهاريدونکې ګڼلي دي.
د ټولو بدبختیو ، جنګ ، تبعیض ، ټالبانو ته د بیا راتګ زمینې مساعدول ټول د کرزي د ناکاره دولتمدارۍ نتیجه ده . کرزی خپل ځای ناستې ته د توطئو جوړولو مسوولیت هم پر غاړه لري . د نړیوالو مرستو پرځای نه مصرفول ، د یوې قوي او باثباته ملي اردو نه جوړول ، جنګ سالارانو ، غلو ، غاصبینو سره مدارا او هغوی ته واک ورکول ، د بېګناه خلکو وژل او زنداني کول هغه څه وو چې دا دی نن یې واک په لاس کې دی.
کرزي او عبدالله غوښتل یوځل بیا د موقت حکومت واګې په لاس کې واخلي خو ټالبانو یې دا خوب ورباندې حرام کړ.