تاند:( چار شنبه، د ثور يو ويشتمه) په پنجشیر کې د طالبانو سیمه ییز چارواکي وايي چې د دغه ولایت په درې ولسوالۍ کې سلګونه مخالفین له دوی سره یو ځای شوي دي.
د پنجشېر د والي ویندوی ابوبکر صدیق وايي، شاوخوا ۵۰ تنو وسله والو د پنجشېر د آبشار ولسوالۍ په غرونو کې وسلې پر مځکه ایښي او ۶۰ نورو په دره ولسوالي کېئ جګړه بس کړې او خپلې وسلې یې د طالبانو اسلامي امارت ته سپارلې دي.
د درې ولسوالۍ لپاره د طالبانو ولسوال وايي چې د تېرو دوو ورځو په موده کې د پنجشېر د درې ولسوالۍ له پايه سلام، خواجه او ځينو نورو سيمو څخه سلګونه مخالفین د سولې له بهیر سره يو ځاى شوي دي.
دا په داسې حال کې ده، چې ځايي خلکو د طالبانو خلاف د مقاومت ډلې سره د تړاو په تور د سلګونو عامو خلکو د نيولو ادعا کړې ده.
طالبانو مخکې په هېواد کې د دوی د وسله والو مخالفو ډلو موجوديت يوازې تبليغات ګڼل او ټينګار يې کاوه، چې مخالفين يې هيچیرته عملي حضور نه لري.
اوس، چې يوازې په پنجشېر کې يې د سلګونو وسله والو مخالفانو د تسليميدو خبره کړې، د منتقدینو له نيوکو سره مخامخ او خلکو ته په دروغ ويلو تورن شوي دي.
طالب وياندويانو د خپلو ضد و نقيضو څرګندونو په اړه نيوکو ته غبرګون نه دی ښودلی.
خو له دې سره سره په پنجشېر کې که طالبانو ته د مخالفو وسله والو تسلیمېدل تایید شي، د طالبانو مخالفانو ته لوی ګوزار ګڼل کېږي. هغوی په سیاسي ډګر کې د خپلمنځي اختلافاتو له کبله مخکې لا له سخت ګوزار سره مخامخ شوي وو.