تاند:( یکشنبه، د ثور اتلسمه) د ننګرهار هسکې مېنې ولسوالۍ کې سيلانيانو ته په وړيا ډول د چايو ورکړې هوټل پرانیستل شو.
په ننګرهار کې د طالبانو د والي مطبوعاتي دفتر وايي، چې دغه هوټل د شينوارو اصلاحي ټولنې لخوا د دغې ولسوالۍ ګورګورۍ سيمې ته د ورتلونکو سيلانيانو لپاره جوړ شو.
دغه ټولنه وايي چې ورتلونکو سيلانيانو ته به د ګورګورۍ سيمې ټولې منظرې ورښکاره کوي او هم به پرې وړيا چايونه څکي.
د يادې ټولنې غړي وايي، له دغې چارې يې موخه راتلونکو سيلانيانو ته د شينوارو د دود دستور او مېلمه پالنې ورښکاره کول دي او دا چې دغه سيمې کلونه د جګړو له امله نا امنه پاتې وې اوس ورته د سيلانيانو پام اړول دي.
يو شمېر خلکو دا کار ستایلی او په نورو سیمو کې يې هم د سياحت د پياوړتيا لپاره د ورته هڅو غوښتنه کړې ده.