تاند(چهارشنبه، د ثور۱۴مه) په افغانستان کې د سره صلیب د نړیوالې کمېټې د پلاوي رييس وايي په افغانستان کې بېوزلي د زیاتېدو په حال کې ده او له نړیوالې ټولنې غواړي چې په دې هیواد کې دې ستر بشري بحران ته پام واړوي.
ایلوي فیلیون پر خپله ټویټرپاڼه د یوې ویډیو د خپرولو ترڅنګ لیکلي:«سړي، ښځې او ماشومان په کابل کې د شپې مهال د نانوایانو مخې ته کتار دریږي؛ انتظار باسي چې لږ څه ډوډۍ ورکړل شي.»
فیلیون زیاتوي چې په افغانستان کې بیوزلي او لوږه په چټکه مخ په زیاتېدو ده:«هره ورځ د افغانستان خلک لا بیوزله کېږي؛ افغانان دومره بېوزله شوي چې ما تر دې مخکې نه و لیدلي.»
ده له نړیوالو د مرستو غوښتنه وکړه، ویې ویل چې نړۍ افغانستان ته شا نه شي اړولی.
د سره صلیب د نړیوالې کمېټې د پلاوي مشر، تر دې مخکې هم څو ځلې په افغانستان کې د ماشومانو د ژوند په اړه اندېښنه ښکاره کړې وه او ویلي و چې چې ورځ وځي د کابل په واټونو کې د هغو ماشومانو شمېر زیاتېږي چې کار کوي. د دغو ماشومانو اکثریت د هغو دی چې میندې او پلرونه یې په تېرو کلونو کې وژل شوي دي.
له بلې خوا د خوړو نړیوال پروګرام وايي، سږ (۲۰۲۲) په افغانستان کې شاوخوا ۲۳ ميلیون وګړي خوړو ته سخت اړ دي.