تاند:( دوشنبه، د ثور پينځمه) په پاکستان کې د طالبانو د سفارت چارواکو ويلي، چې پاکستاني چارواکو سره يې په دغه هېواد کې د ايسارو افغانانو د وتو په اړه هوکړه شوې ده.
د سفارت په یوه اعلامیه کې راغلي، چې په تورخم او پاکستان کې ايسار افغانان د روانې ثور میاشتې تر نهمې پورې خپل هېواد ته ستنيدای شي.
د سرچينې د معلوماتو په اساس، دغه ايسار پاتې افغانان د خپلو تذکرو له مخې افغانستان ته سفر کولای شي.
په وروستيو کې ګڼو افغانانو شکايت درلود، چې پاکستاني پوليس له تورخم څخه خپل هېواد ته د ستنېدو اجازه نه ورکوي.
طالب چارواکو د دې ستونزې د حل ډاډ ورکړی و.
د جمهوري نظام له سقوط او د طالبانو له بيا واکمنیدو سره سلګونه زره افغانان په قانوني او ناقانونه توګه د طالبانو له وېرې يا د بې کارۍ له کبله پاکستان او ايران ته تللي، چې هلته یې د زياتو ستونزو خبر ورکول کېږي.