تاند:( دوشنبه، د حمل ۲۹ مه) د طالبانو له لوري د خبریالانو پر وړاندې د تاوتريخوالي په تازه راپورونو کې د آريانا ټلويزيون د یوه ویاند د شکنجې او د ننګرهار د يوې سيمه ييزې خصوصي راډيو د مسؤل د نیول کیدو خبر ورکړل شوی.
د خبریالانو د دفاع بنسټونو ويلي، چې د اريانا ټلويزيون پخوانی وياند محب جليلي د طالبانو له لوري په کابل کې نيول شوی او سخت شکنجه شوی دی.
په ورته وخت کې د ننګرهار د يوې سيمه ييزې راډيو « حقيقت غږ» مسوول الهام حقيقت د طالبانو استخباراتو ادارې نيولی.
ويل شوي، چې نوموړی د پاکستان پر ضد د لاريون د خبري پوښښ په وخت کې نيول شوی.
د افغانستان مختلفو رسنيزو ټولنو په دې اړه انديښنه ښودلې او ویلي، چې طالبانو د رسنيو پر وړاندې افراطي قيودات او تاوتریخجن چلند زيات کړی.
د خپرو شويو معلوماتو په اساس، د طالبانو په شاوخوا ۷ مياشتينۍ واکمنۍ کې تر ۸۰ پورې افغان خبريالان نيول شوي، چې ځينې ټکول شوي هم دي.
طالبانو په ټوله کې رسنيو سره د ناسم چلند ادعاوې ردوي، خو په ځينو حالاتو کې رسنۍ په خپله اصطلاح د « اسلامي شريعت» له اصولو سرغړونکي بولي.