تاند:( دوشنبه، د حمل ۲۹ مه) د طالبانو د دفاع وزارت د لوی درستیز مرستیال حاجي مالي خان د خوست افغان دوبۍ سیمې ته تللی دی.
د طالبانو د خبرپاڼې له مخې؛ مالي خان په یاده سیمه کې د پاکستان د وروستیو بریدونو د قربانیانو له کورنیو سره کتلي او د هر قرباني کورنۍ ته یې ۲۰-۲۰ زره افغانۍ هم ورکړې دي.
طالب سرچینو ویلي چې د لوی درستیز مرستیال په دغه سفر کې له سرحدي ځواکونو سره هم کتلي او په دفاعي برخه کې یې د بېړنۍ همکارۍ ډاډ ورکړی دی.
دا په داسې حال کې ده، چې مخکې د طالبانو د ویاند په دې خبره چې ګواکي د وزیرستاني کډوالو کمپ بمباري شوی، ځینو خلکو غبرګونونه وښودل.
طالبانو تر اوسه په خوست او کونړ ولايتونو کې د پاکستان د بمبارۍ او په پکتيا کې د دوی پر ځواکونو د ځمکنیو بریدونو د تلفاتو جزییات نه دي خپاره کړي. خو ځايي سرچینې وايي چې په خوست کې تر ۴۰ ډېر او په کونړ کې ۶ تنه وژل شوي دي.