تاند:( یکشنبه، د حمل ۲۱ مه) د افغانستان برېښنا شرکت چارواکو د سلما بند د درېيم ټوربین د فعالیدو خبر ورکړی.
دغه شرکت په یوه اعلامیه کې ویلي، چې تخنیکي کارکوونکو يې له دوامداره هڅو وروسته د سلما بند درېیم ټوربین ترمیم او بیا ځل د برېښنا په شبکه کې شامل کړ.
بريښنا شرکت وايي، چې د یاد ټوربین بیا ځلې فعالېدو سره سلما بند کې د برېښنا تولید بېرته عادي حالت ته را وګرځېد.
دغه شرکت زیاتوي، چې همدا اوس د سلما بند درې ګوني توربینونه تر ۳۰ مېګاواټه زیاته برېښنا تولیدوي.
دا خبر په داسې مهال خپور شوی، چې په ایران کې د افغان کډوالو پر وړاندې د ناوړه چلند له زیاتیدو سره پر طالبانو ولسي فشار زیات شوی، څو ايران ته د اضافي اوبو د ور پريښودو هوکړې لغوه کړي.
د طالبانو یو شمېر مطبوعاتي مبلغينو د خپل دفاع وزیر ملا یعقوب مجاهد په حواله ویلي، چې ایران ته بهېدونکي اوبه به ودروي.
د سلما بند په اړه د بریښنا شرکت څرګندونې ځينې شنونکي د ایران په اړه پر طالبانو د ولسي فشارونو د کمولو هڅه بولي.