تاند(یکشنبه، د حمل ۲۱ مه) د عمران خان په مشرۍ تحریک انصاف ګوند د صدراعظم عمران خان له سلب اعتماد کېدو وروسته نن په ټول هیواد کې د احتجاج اعلان کړی دی.
تېره شپه د پاکستان د ملي جرګې اکثریت غړیو عمران خان ته د بې باورۍ رایې ورکړې او د پاکستان د ملي جرګې ريیس له دندې استعفا ورکړه.
مخکې تر دې چې عمران خان ته د عدم اعتماد رایې ورکړل شي، د ملي جرګې ريیس اسد قیصر، چې د عمران خان کلک پلوی دی، استعفا ورکړه او ویې ویل چې نه غواړي د ده تر مشرۍ لاندې عمران خان ته د بې باورۍ رایې واچول شي.
د اسد قیصر تر استعفا وروسته د ملي جرګې د ۳۴۲ غړیو له منځه ۱۷۴ د عدم اعتماد په پلوۍ رایه ورکړه. د عدم اعتماد رایې اخیستو لپاره ۱۷۲ رایو ته اړتیا وه
په پام کې ده چې سبا (دوشنبه) به لومړی د ملي جرګې نوی ريیس غوره شي او بیا به نوی صدراعظم ونومول شي.
د اپوزیشیون ګوندونو، د مسلم لیګ نون مشر شهباز شریف د صدراعظمۍ چوکۍ ته کاندید کړی خو په مقابل کې یې تحریک انصاف شاه محمود قریشي نومولی دی.
په همدې حال کې د عمران خان په مشرۍ تحریک انصاف ګوند، چې ادعا کوي د عمران خان په سلب اعتماد کېدو کې امریکا لاس لري، له نن ماخوستن څخه په ټول پاکستان کې د احتجاجي مظاهرو اعلان کړی دی.
له بلې خوا د خیبر پښتونخوا ګونر شاه فرمان ویلي، که شهباز شریف صدراعظم شو، په هماغه ورځ به له دندې استعفا ورکړي.
عمران خان په داسې وخت کې د صدراعظمۍ له چوکۍ لېرې شو چې پاکستان له سخت اقتصادي او ټولنیز بحران سره مخامخ دی. په پاکستان کې ډېر لږ داسې شوي چې یو منتخب حکومت د واک موده بشپړه کړي.
د پاکستان نوی جوړېدونکی حکومت به له دې کبله یو کمزوری او زیانګالی حکومت وي چې په لږ اکثریت او د ډېرو ګوندونو د ايتلاف له لوري جوړېږي.