تاند:(يکشنبه، د حمل۱۴ مه) د پاکستان ولسمشر عارف علوي د صدراعظم عمران خان په غوښتنه د دغه هېواد پارلمان (ملي جرګه او څلور صوبايي جرګې) منحل او تر وخت مخکې انتخاباتو د ترسره کيدو امر وکړ.
دا پریکړه په داسې حال کې شوې، چې نن پارلمان د صدراعظم عمران خان د کار د دوام او نه دوام په اړه رايه اچونه په پام کې لرله.
که دا کار شوی وای، له واکه د عمران خان ګوښه کیدل حتمي ګڼل کیده، ځکه د پارلمان ډېرو غړو یې د مخالفو ګوندونو خوا نیولې وه.
د پاکستان ولسمشر د عمران خان په غوښتنه مخکې له دې، چې پارلمان له عمران خان څخه د باور رايه بیرته واخلي او ګوښه يې کړي، پارلمان یې ړنګ او تر وخت مخکې پارلماني ټاکنو امر وکړ.
د پاکستان سیاسي جوړښت پارلماني- فیدرالي دی، چې ولسمشر پکې سمبوليک او صدراعظمد پارلمان د غړیو په رایو غوره کېږي، اساسي واکونه لري.
د پاکستان د اساسي قانون له مخې، د پارلمان له ړنګېدو څخه وروسته د ټاکنو موقت کميسيون په درېیو میاشتو کې تر وخت مخکې ټاکنو د ترسره کولو دنده لري.
شنونکي باور لري چې د پاکستان د دې سیاسي ناندریو ريښې هم د ډېرو نورو حکومت بدلوونکو جنجالونو په شان د دغه هېواد پوځ ته رسیږي.
د پاکستان صدراعظم عمران خان پرته له دې، چې د پوځ په اړه د څه ویلو جرئت وکړي، خو پر ضد یې پیل شوې هڅې د امریکا دسيسه ګڼلې ده.
عمران خان ادعا کړې چې روسیې ته له سفر څخه یې امریکا ناراضه ده او په دې ورته غوسه ده چې ولې یې پر اوکراین د روسیې برید نه دی غندلی.
د عمران خان مخالفان بيا د نوموړي خلاف اعتراضونه د حکومت له ناکامۍ او د اقتصادي ستونزو له زیاتیدو سره تړي.
دا په داسې حال کې ده، چې له سیمې او نړۍ سره د اړيکو په اړه د پاکستان د پوځ او ملکي حکومت دریځونه سره جلا ښکاري.
په داسې حال کې، چې صدراعظم عمران خان د چین او روسیې خوا نیولې او امريکا یې د ځان خلاف په هڅو تورنه کړې، د پاکستان د پوځ مشر جنرال باجوه د امريکا او چين ترمنځ اړیکو کې د توازن ساتلو ټینګار کړی.
ځینې راپورونه دا هم وايي، چې پوځ د عمران خان د ملاتړ او مخالفت په اړه سره ويشل شوی او ځینې مشران یې د عمران خان ملاتړ کوي.
د پاکستان د اساسي قانون د ۵۸ مادې پر اساس، صدراعظم د ملي جرګې او ایالتي جرګو د منحل کېدو غوښتنه کولی شي خو له دې کبله چې عمران خان په داسې حال کې چې د عدم اعتماد رایې سره مخامخ و، د پارلمان د منحل کېدو غوښتنه یې قانوني ستونزې لري.
د پیپلز ګوند مشر بلاول بوټو خبریالانو ته وویل چې اپوزیسیون به د اعتراض په دود پرلتۍ ووهي او په ستره محکمه کې به دعوه اقامه کړي.
د ړنګ شوي پارلمان له لوري د عمران خان له پلان شوي بې واکه کیدو سره باور دا و، چې مخالف ګوندونه به د پخواني بې واکه شوي صدراعظم نواز شریف ورور او د پنجاب فیدرالي ادارې پخوانی وزير اعلی شهباز شريف صدراعظم شي.
اوس، چې يو مخ پارلمان هم ړنګ شوی او له سره ټاکنې ورته کیږي، معلومه نه ده چې د پارلمان ډېرې څوکۍ به کوم ګوند یا د ګوندونو ایتلاف ګټي او صدراعظمي به چا ته رسيږي.