تاند(شنبه، د حمل ۱۱) په هرات ولایت کې پرون (جمعه) په یوه چاودنه کې لږترلږه ۱۲ تنه وژل شوي او ۲۵ نور ژوبل شوي دي.
د هرات د عامې روغتیا ریاست چارواکي وايي چې دې کسانو ته د لوبو په یوه میدان کې مرګ ژوبله اوښتې ده.
راپورونه وايي چې چاودېدونکي مواد د سپورتي لوبو په یوه میدان کې تر خاورو لاندې اېښودل شوي وو او له کبله یې تنکي ځوانان وژل شوي یا ټپیان شوي دي.
تراوسه پورې کومې ډلې د دې برید مسوولیت په غاړه نه دی اخیستی.
له دې سره په یو وخت پرون (جمعه) په هلمند ولایت کې ۵ ماشومان هغه مهال په چاودنه کې ووژل شول چې د هاوان له یوې ګولۍ سره یې لوبې کولې.
د هلمند د اطلاعاتو او فرهنګ ريیس عبدالباري راشد وویل، دا پېښه په مارجې ولسوالۍ کې هغه مهال وشوه چې ماشومانود هاوان له ګولۍ سره لوبې کولې.
ده د وژل شویو ماشومانو عمرونه د ۳ او ۱۲ کلونو ترمنځ وبلل.