تاند:(يکشنبه، د حوت ۲۹ مه) د افغانستان د بريښنا شرکت چارواکي وايي، چې افغانستان ته د ازبکستان د وارداتي برېښنا پرې شوي مزي يې بيرته تړلي او د بريښنا د نشتوالي ستونزه حل شوې ده.
دا مزي پرون په ازبکستان کې د سخت توپان له کبله پري شوي وو.
د بريښنا شرکت چارواکي وايي چې اوس په کابل او نورو هغو ولايتونو کې د بریښنا ستونزه بيرته حل شوې چې د ازبکستان له بریښنا څخه برخمن وو.
پرون په هرات کې د سخت توپان له کبله له ترکمنستان څخه هم د وارداتي برېښنا مزي پرې شوي وو.
د افغانستان شاوخوا ۸۰ سلنه بريښنا له ګاونډيو هېوادونو څخه برابرېږي.
د نړیوالې ټولنې له ۲۰ کلن حضور او زرګونه میلیارد ډالرو لګښتونو سره سره د بريښنا په تولید پانګونه نه ده شوې.
د افغانستان پریمانه اوبه له څو لسيزو راهیسې په وړيا ډول ايران او پاکستان ته روانې دي او ويل کېږي چې دا دوه هېوادونه د افغانستان د بې نظامه ساتلو لپاره د نورو ګټو تر څنګ د پریمانه وړيا اوبو لپاره خپلو هڅو ته دوام ورکوي.